今日pre wedding相簿嘅排版亦都處理好，可以有少少時間講吓當日濟州影pre Wedding嘅細節。
未被求婚前我已經想喺濟州影Pw，因為俾佢四季都有花影而吸引，而我最喜歡就係蕎麥花，所以一早決定2024年九月尾去濟州。IG有好多間唔同嘅一站式韓國攝影公司，起初我心思思諗咗好耐揀邊間，有啲會包酒店住宿，有啲就喺分展擺到個booth好鬼大，但最終我都係決定揀Fairytail_wedding。
其實開頭都好擔心，因為佢IG follower實在少，而且喺香港冇公司，生怕有事起上嚟搵唔到人負責。不過聯絡人Hena十分好，幾乎問親嘢都會覆得好快，呢個比我好大嘅信心。加上咁啱身邊有朋友不約而同亦都幫襯咗佢哋，所以就決定交重要嘅pw比佢哋。
出發前一星期，聯絡人開始提我哋要準備什麼東西，亦會問我哋想唔想額外加氣球、鮮花等配件，其實淨係需要帶個軀殼同個nude bra去，其他嘢乜都唔使諗哈哈。
拍攝當日，司機同聯絡人準時九點就到酒店樓下接我哋。大約20分鐘車程就到化妝室，一到步新娘子先化妝/set頭，都搞左成個半鐘，新郎哥亦都需要用少少時間化淡妝。化妝室都算大，有好多件婚紗俾你揀，亦有唔同嘅婚鞋俾你著。新娘子可以出發前就揀定心儀嘅婚紗截圖比化妝室睇，當時我都試咗六套婚紗，就可以出發影相。
一同出發嘅除咗司機、聯絡人，仲有一個助手一行五人。我係咁同Hena講，我係嚴重鏡頭尷尬癌，一向影相都好生硬，亦唔識擺動作。Hena同我講，放鬆啲，當玩咁就得，攝影師會好好幫助我去投入影相。
第一個場景就係去影蕎麥花，果然攝影師(jeju207)真係好有經驗，一埋位就先播歌，聽住愉快嘅音樂，個人都笑得自然啲。然後攝影師亦會指導我哋好多動作，知道我哋怕望鏡頭，就會選擇影我哋嘅互動，Hena亦會從旁翻譯同協助。最後就係不停為我補妝、換髮型、放靚裙擺嘅助手姐姐，佢實在係勞苦功高。
當日嘅拍攝，由下午一點影到黃昏六點，影咗四個場景，包括蕎麥花、粉紅色芒草、牧場同海邊。過程開心又難忘，最後佢哋車返我哋去酒店附近，夜晚食咗個BHC炸雞，一覺瞓天光第日就飛返香港了。
而家諗返都覺得好神奇，感覺距離big day又近一步，要完成嘅check list有多一項。今日排版完個相簿，覺得啲相好靚，估唔到自己都可以影到啲咁好睇嘅相，一切功勞都要歸咎Fairytail整個團隊嘅幫忙。記得最後我同Hena講，希望你哋越做越大，讓更加多人發掘到你哋呢間公司，生意興隆，蒸蒸日上。
以上全部都係我好真摯感受，唔係打手，希望大家多啲支持佢哋。
原文出處: 婚享同學會 Wedding Union